Свети Исаак Сирин: Слово 48. За тоа, поради кои причини, Бог им ги допушта искушенијата на оние, коишто го љубат.

Од љубовта, којашто светителите ја покажуваат кон Бога, низ сѐ што поднесуваат заради името Негово, нивните срца се стекнуваат со дерзновение – Него да го гледаат слободно, та со увереност да бараат од Него исполнување на нивните молби, оти голема е силата на молитвата, којашто се збива со дерзновение пред Бога. Затоа, Бог ги остава светителите негови, да бидат искушани со секаква скрб, за да добијат опит од Неговата помош и од Неговата промисла – бидејќи, преку искушенијата стекнуваат мудрост и совест; та, да не бидат лишени од ученоста, да не се неуки и да не им е ускратена извежбаноста и на двата дела, на доброто и на лошото, па низ опит да стекнат знаење за сите Негови творби, не претрпувајќи измами од демонот; зашто, доколку се вежбаа само во добрите нешта, тогаш ќе беа лишени од вежбањето во лошите нешта; и, следствено, во борбите ќе беа соголени и неискусни.

Continue reading “Свети Исаак Сирин: Слово 48. За тоа, поради кои причини, Бог им ги допушта искушенијата на оние, коишто го љубат.”

Свети Исаак Сирин: Слово 25. За трпението, коешто се збива заради Божјата љубов и како во него се наоѓа љубовта и помошта Божја.

sv. isaak sirin

Онолку, колку што човекот го презира овој свет и ревнува во стравот Божји, во таа мерка нему му се приближува промислата Божја и човекот мистично ја  чувствува нејзината помош, та му се даваат чисти помисли, за да ја разбере Божјата промисла. И, доколку некој своеволно се одрече од овоземните добра, тогаш, сразмерно на тоа во која мерка се лишува, него ќе го следи Божјото милосрдие и ќе го крепи Божјото човекољубие. Нека биде препрославено името на Бога, Којшто нѐ спасува нас и преку средства од десно и преку средства од лево, та ни дава причина, преку сите овие средства да го пронајдеме нашиот живот, затоа што и на оние, кои се со немоќна воља и не можат да го достигнат вечниот живот, им ги раководи душите, преку волните невољи, во доблеста.

Ниту оној сиромашниот Лазар не беше своеволно лишен од овоземните добра; а, и телото негово беше прекриено со рани, та истовремено го камшикуваа две горки страдања, од коишто едното полошо од другото; па сепак, подоцна беше почестен во прегратките Авраамови. Бог секогаш пребива блиску до растаженото срце на оние, коишто во скрб и притесненија повикуваат кон Него. И, ако некогаш ги нажалости нив со телесни страдања или ги искуша преку други начини (а, сѐ додека не се навикнеме на сето ова, го прави тоа за наша помош, оној лекар, којшто ги сече деловите на тешко болниот и му го враќа неговото здравје), сепак, на душата, Господ ѝ покажува големо човекољубие.

Continue reading “Свети Исаак Сирин: Слово 25. За трпението, коешто се збива заради Божјата љубов и како во него се наоѓа љубовта и помошта Божја.”

Кратко житие на светиот Исаак Сирин

sveti isaak sirin

Светиот отец наш Исаак, великиот и чудесен во доблеста, небесножителниот човек и земниот ангел, по род Сириец, роден е, според едни – во Нинивија, Месопотамија, според други – во Сирија.

Во младешката возраст, заедно со неговиот брат, заминал во манастир. Откако ја облекол ангелската схима и откако се подвизувал во аскетските борби и трудови на општежителниот монашки живот, се оддалечил „сам со Бога“ во осамена келија недалеку од манастирот, кадешто се посветил на отшелнички живот и молитвено тихување.

Не требаше свеќата да биде сокриена во пустината, туку да биде поставена на пастирски свеќник. Кога се прочул по светоста на неговиот живот, ученоста и чудотворството, тој бил избран за Епископ на големиот град Нинивија. На епископскиот, пак, престол, останал само пет месеци. Извесен е еден настан од тој период на неговиот живот. Имено, на светиот Исаак Сирин, во Епископијата му дошле на суд двајца противници. Едниот барал должникот да му го врати долгот, другиот молел да му се одложи враќањето на споменатиот долг. Светиот Исаак Сирин започнал да го советува оној што го барал долгот да почека за враќањето, бидејќи светото Евангелие учи дека воопшто и не треба да го бараме тоа што некој ни го должи. Но, на таа поука на светителот, оној човек, којшто го барал долгот, грубо одвратил: „Бре, оче, остави го веќе тоа Евангелие“! Штом ги чул тие зборови, светиот Исаак Сирин рекол: „Кога овие не го слушаат Евангелието, тогаш што барам јас тука“! Тој тајно се повлекол на гората Мат и таму живеел пустиножителен живот.

Светиот Исаак Сирин составил многу дела од коишто најпознати се неговите прочуени „Аскетски слова“, т.е. неговите беседи за подвижничкиот живот, кои претставуваат омилено четиво за сите Христијани, а особено за монасите. Познато е дека единствената книга, којашто во својата монашка келија ја чувал извесниот подвижник на XX-от век, старецот Паисиј Светогорец, биле словата на светиот Исаак Сирин.

Големиот отец и раководител во духовниот живот, светиот Исаак Сирин, живеел и се упокоил во VII-от век.